சிங்கப்பூரில் ஜூன் 1-ம் தேதி சர்க்யூட் பிரேக்கர் நடவடிக்கை முடிவு நெருங்கும்போது, சிங்கப்பூர் உள்ளேயும், வெளியேயும் அத்தியாவசிய பயணங்களை மீண்டும் தொடங்க சிங்கப்பூர் பரிசீலிக்கும் என்று தெரிவிக்கப்பட்டுள்ளது.
தேசிய வளர்ச்சி அமைச்சர் லாரன்ஸ் வோங், நேற்று மே 28 அன்று செய்தியாளர் கூட்டத்தில் சிங்கப்பூர் தொடர்ந்து உரையாடல்களை மேற்கொண்டு வருவதாகவும், எங்கள் எல்லைகளை மீண்டும் திறப்பதற்கான பணிகளை மேற்கொண்டு வருவதாகவும் தெரிவித்துள்ளார்.
இதையும் படிங்க : சிங்கப்பூரில் COVID-19 தொற்றிலிருந்து மேலும் 1,000-க்கும் மேற்பட்டோர் குணமடைந்துள்ளனர்..!
இந்த கொரோனா வைரஸ் நிலைமை கட்டுப்பாட்டில் உள்ள நாடுகள் மற்றும் தகுந்த முன்னெச்சரிக்கை நடவடிக்கைகளைச் செயல்படுத்தத் தயாராக உள்ள குறிப்பிட்ட நாடுகளுக்குப் பயணம் செய்ய அனுமதிப்பது பற்றி சிங்கப்பூர் பரிசீலித்து வருகிறது என்று திரு வோங் தெரிவித்துள்ளார்.
இருப்பினும், சிங்கப்பூரில் அத்தியாவசிய பயணம் மட்டுமே மீண்டும் தொடங்க அனுமதிக்கப்படும் என்றும் தெரிவிக்கப்பட்டுள்ளது.
சிங்கப்பூரில் உள்ள வர்த்தக ஊழியர்கள் வட்டார நாடுகளுக்கு சுற்றி பயணிக்க வேண்டியது அவசியம், எனவே அத்தியாவசிய பயணங்களை மீண்டும் தொடங்குவதன் மூலம் அவர்கள் பயனடைவார்கள் என்று வோங் குறிப்பிட்டுள்ளார்.
இது வணிகத்தை மீண்டும் தொடங்குவதற்கு மட்டுமல்லாமல், வேலைகள் தொடர அனுமதிக்கும் என்றும் அவர் கூறினார்.
மேலும், சிங்கப்பூரர்கள் இங்கு மட்டுமல்ல, அவர்கள் தங்களுடைய பணி காரணமாக பயணிக்க வேண்டிய இடங்களுக்கும் தொடர்ந்து பயணம் செய்ய வழிவகை செய்யும் என்றும் அவர் கூறினார்.
இருப்பினும், இதன் மூலம் பெரும் எண்ணிக்கையிலான வர்த்தக பயணம் மீண்டும் தொடங்கும் என்று அர்த்தமல்ல. அதாவது அனைவரும் பயணம் மேற்கொள்ள முடியாது என்றும், அதற்கு ஏற்பாடுசெய்யக் கூடுதல் காலம் எடுக்கும் என்றும் அமைச்சர் வோங் கூறினார்.
பாதுகாப்பு மற்றும் ஏற்பாடுகளுக்கு உட்பட்டு அத்தியாவசிய பயணம் மட்டுமே பரிசீலிக்கப்படும் என்று தெரிவிக்கப்பட்டுள்ளது.
இதையும் படிங்க : சிங்கப்பூரில் வெளிநாட்டு ஊழியர்களின் கைபேசி சிம் கார்டுகளில் $10 பணம் நிரப்பப்பட்டது..!